- text
મોરબી : માળીયામિયાણા સહિત મોરબી જિલ્લામાં જુદી જુદી ઓળખ આપી ચીટીંગ કરતી ચાર ઠગારાઓની ગેંગને પોલીસે રિમાન્ડ પૂર્ણ થતાં જેલહવાલે કર્યા હતા. આ ગેંગની ઠગાઈનો ભોગ બનનાર અને ફરિયાદ કરવા આગળ ન આવનાર અન્ય લોકોને નિર્ભય રીતે ફરિયાદ કરવા સામે આવવાની પોલીસે અપીલ કરી છે. આવા મિસ્ટર નટવરલાલોની જાળમાં અન્ય કોઈ ન ફસાય તેવી અપીલ પણ પોલીસે કરી છે.
જેલ હવાલે કરાયેલા ચારેય ઠગબાજો માળીયા મિયાણા નજીક પોલીસની ઓળખ આપી જુદી જદી મોડ્સ ઓપરેન્ડરીથી છેલ્લા કેટલાક સમયથી લોકો સાથે ચિટીંગ કરતા હતા. જેમાં માળિયા પંથકમાં એક સેલ્સમેન સાથે દોઢ લાખની છેતરપીંડી કરવામાં આવી હોય ભોગ બનનારે એસ.પી કરનરાજ વાઘેલાને આ બનાવ અંગે જાણ કરી પોલીસમાં ફરિયાદ નોંધાવી હતી. ગત તા. ૧૯ના રોજ ફરિયાદી ગીરધરલાલ બિશ્નોઈ નામના રાજસ્થાની સેલ્સમેનને માળિયા નજીકની ઓનેસ્ટ હોટલ પાસે ઠગ ટોળકીએ શીશામાં ઉતાર્યા હતા. જેમાં એક લાખના ત્રણ લાખ કરી આપવાની લાલચ આપી ટોળકીએ સેલ્સમેન પાસેથી દોઢ લાખની રકમ પડાવી હતી.
છેતરપીંડી થયા બાદ ભોગબનનારે એસ.પી કચેરીનો સંપર્ક સાધ્યો હતો. ત્યાર બાદ મોરબી જીલ્લા પોલીસવડા ડો. કરનરાજ વાઘેલાના માર્ગદર્શન હેઠળ એલ.સી.બી ટીમ અને પેરોલ ફર્લો સ્ટાફ પેટ્રોલિંગમાં હતી એ દરમિયાન મળેલી હકીકતને આધારે, પોલીસની ખોટી ઓળખ આપી તથા એક લાખના ત્રણ લાખ કરી આપવાની લાલચ આપી શિકારને ફસાવી પૈસા પડાવતા આરોપી રફીક ઉર્ફે રાજન નજર મહમદ સંઘવાણી, રહે. મોરબી વિસીપરા, યુસુફ કાદર જેડા, રહે. માળિયા, સલીમ દાઉદ માણેક, રહે. મોરબી વિસીપરા અને હાસમ ઉર્ફે મામુ અલીમહમદ મોવર, રહે. મોરબી વિસીપરા એમ ચાર આરોપીને ઝડપી પાડ્યા હતા. આરોપીઓ પાસેથી રોકડા રૂ.૧,૫૦,૦૦૦ તેમજ ૨ મોબાઈલ કિંમત રૂ. ૧૦,૦૦૦, મહિન્દ્રા બોલેરો ગાડી નં જી જે ૩૬ એફ ૫૨૮૧ કિંમત રૂ. ૫ લાખ સહીત કુલ ૬.૬૦ લાખના મુદામાલ સાથે ઝડપી લીધા હતા. જેની વધુ તપાસ માળીયા મિયાણા પોલીસે હાથ ધરી હતી. ત્યાર બાદ તમામ આરોપીઓને કોર્ટે ચાર દીવસના રિમાન્ડ આપતા રિમાન્ડ પર લીધા હતા. જે રિમાન્ડ પૂર્ણ થતાં ચારેય ઠગબાજોને જેલહવાલે કરવામાં આવ્યા છે.
- text
આ ઠગ ટોળકીએ અનેક લોકો સાથે છેતરપીંડી આચરી છે. જેમાં એક મહિલા સાથે નોટબંધી સમયે રૂપિયા બદલવાની લાલચ આપી ૨૦ લાખની છેતરપીંડી પણ સામેલ છે. એ સિવાય કચ્છના વેપારીને સોનાના બિસ્કિટ નજીવી કિંમત આપવાનું કહીને પણ છેતરપીંડી આચરી હોવાની વિગતો સુત્રોમાંથી જાણવા મળી છે. આ સિવાય પણ આવી અનેક છેતરપીડીઓ છે. જેમાં ફરિયાદીઓ પોતે ગેરકાયદેસર બાબતના રૂપિયા આપ્યા હોવાથી પોલીસ ફરિયાદ કરવા સામે આવતા નથી. પરંતું પોલીસે જાહેર કર્યું છે કે આવા તત્વો દ્વારા અન્ય કોઈ છેતરાય નહિ એ માટે તેના ચહેરાઓ ખુલા પાડવામાં આવ્યા છે ત્યારે અન્ય કોઈ આ તત્વોનો ભોગ બન્યો હોય તો પોલીસ ફરિયાદ નોંધાવા પણ મોરબી એસ.પી કચેરી અથવા જે તે પોલીસમથકનો સંપર્ક કરી પોલીસ ફરિયાદ નોંધાવે તો ફરિયાદીની સામે કોઈ પગલાં ભરવામાં આવશે નહિ તેવી જાણકારી પોલીસ વિભાગ તરફથી આપવામાં આવી છે.
- text
