- text
છેલ્લા ત્રણ દિવસમાં પોલીસે 62 વાહનો પકડીને કરી કાર્યવાહી
મોરબી : મોરબી જિલ્લામાં માતેલા સાંઢની જેમ રોડ ઉપર પુરપાટ ઝડપે નીકળતા નંબર પ્લેટ વગરના ઓવરલોડેડ વાહનો વિરુદ્ધ મોરબી ટ્રાફિક પોલીસે શરૂ કરેલી ઝુંબેશ રંગ લાવી રહી છે. આજે ટ્રાફિક પોલીસે આવા વધુ 24 કાળમુખા વાહનો ડિટેઇન કરી કાયદેસરની કાર્યવાહી હાથ ધરી હતી.
છેલ્લા લાંબા સમયથી મોરબી જિલ્લામાં અકસ્માતોનું પ્રમાણ ખુબ જ ઉંચુ ગયું છે અને મોટાભાગના અકસ્માતોમાં અકસ્માત સર્જી વાહન ચાલક નાસી જતા હોવાનું અને આવા અકસ્માત સર્જનાર વાહન નંબર પ્લેટ પણ લગાડતા ન હોવાથી કાયદાકીય પ્રક્રિયા સામે સવાલ ખડા થયા છે ત્યારે મોરબી જિલ્લા પોલીસ વડા દ્વારા તમામ પોલીસ સ્ટેશન અને ટ્રાફિક પોલીસને કડક હાથે કામગીરી કરવા સ્પેશિયલ વાહન ચેકીંગ ડ્રાઇવ શરૂ કરવા આદેશ કરતા છેલ્લા બે દિવસથી નંબર પ્લેટ વગર દોડતા કાળમુખા ઓવરલોડેડ વાહનો વિરુદ્ધ કાર્યવાહી શરૂ કરાઈ છે.
- text
વધુમાં પ્રથમ દિવસે ડમ્પર અને આઇસર સહિતના છ વાહનો ડિટેઈન કરાયા બાદ ગઈકાલે મોરબી જિલ્લા પોલીસ ટિમ અને ટ્રાફિક શાખા દ્વારા નંબર પ્લેટ વગર દોડતા ટ્રેકટર, ટ્રક, ડમ્પર, આઇવા, આઇસર સહિત કુલ 32 વાહનો ડિટેઇન કરી સંબંધિત પોલીસ મથકમાં કબ્જે સોંપી આપવામાં આવ્યા છે.આ સાથે આજે આવા 24 વાહનો પકડી પોલીસે આકરી કાર્યવાહી કરી છે. આમ ત્રણ દિવસમાં પોલીસે 62 વાહનો સામે કાર્યવાહી કરી છે.
- text
