- text
પાર્સલ આપ્યા બાદ સિરામિકના માલિકને મેસેજ કરી બોમથી ઉડાવી દેવાની ધમકીઓ પણ આપી હોવાનું ખુલ્યું : જિલ્લા પોલીસ વડાએ જાહેર કરી બનાવની વિગતો : પરપ્રાંતીય યુવાન પાસે વતન જવાના પૈસા ના હોવાથી સમગ્ર કાવતરું કર્યાનો ખુલાસો
મોરબી : સરતાનપર રોડ ઉપરની સિરામિક ફેક્ટરીમાંથી બૉમ્બ જેવી વસ્તુ મળવાના પ્રકરણમાં પોલીસે મહત્વની વીગતો જાહેર કરી છે. જેમાં આ સમગ્ર કાવતરું એક પરપ્રાંતીય શખ્સનું હોવાનું જણાવવામાં આવ્યું છે. આ શખ્સને પોલીસે પકડી પણ પાડ્યો છે. તેને વતન જવા માટે પૈસાની જરૂરિયાત પૂર્ણ કરવા સાઉથની મુવીમાંથી જોઈને આ બૉમ્બ જેવી ડિવાઇસ તૈયાર કરી તેને ફેકટરીમાં મોકલી માલિકને મેસેજમાં ધમકી પણ આપી હોવાનું ખુલ્યું છે.
વાંકાનેરના સરતાનપર રોડ ઉપર આવેલ સેટમેક્સ સિરામિક ફેકટરીમાં બૉમ્બ જેવી વસ્તુનું પાર્સલ મળ્યાના પ્રકરણમાં જિલ્લા પોલીસ વડા એસ.આર. ઓડેદરાએ જણાવ્યું છે કે પોલીસની પાંચથી છ ટીમ અલગ અલગ દિશામાં તપાસ કરી રહી હતી. જેને સફળતા મળી છે. પાર્સલ આપી જનાર જીતેન લોધી રહે. મધ્યપ્રદેશવાળાનું જ સમગ્ર કાવતરું હતું. પોલીસે તેને પકડી પણ પાડ્યો છે.
વધુમાં એસપીએ જણાવ્યું કે આ આરોપી થોડા સમય પૂર્વે મોરબી જિલ્લામાં આવ્યો હતો. તેને અલગ અલગ સિરામિક ફેકટરીમાં કામ કરવાનો પ્રયત્ન કર્યો હતો પણ પોતાના સ્વભાવના કારણે તે શક્ય બન્યું ન હતું. બાદમાં તેને વતન પરત જવા માટે પૈસાની જરૂર પડતા તેને સાઉથની મુવીમાં જોઈને બજારમાંથી અલગ અલગ વસ્તુ લઈને ટાઈમર બૉમ્બ જેવી દેખાતી ડિવાઇસ તૈયાર કરી હતી. ઉપરાંત તેને ફેકટરી માલિકને ડરાવવા માટે વોટ્સએપ ઉપર મેસેજ પણ કર્યા હતા. આ ફેકટરીમાં તેને કોઈ ઓળખતું ન હોય જેથી તેને આ ફેકટરી પસંદ કરી ગુનાને અંજામ આપવાનો પ્રયત્ન કર્યો હતો.
ઉલ્લેખનીય છે કે આ મામલે હાલ પોલીસ ફરિયાદ પણ નોંધાઇ ગઈ છે. સેટમેક્સ કારખાનામાં સંચાલક હાર્દિકભાઈ બળવંતભાઈ ઘોડાસરાએ વાંકાનેર તાલુકા પોલીસમાં ફરિયાદ નોંધાવી છે કે આરોપી ૯૬૩૮૭૬૮૨૭૯ વાપરનાર વ્યક્તિએ ફરિયાદીના કારખાનાના સિક્યુરીટી ગાર્ડ સાથે એક પ્લાસ્ટિકની થેલીમાં સફેદ કલરના બોક્ષમાં બોમ્બ જેવી વસ્તુ મોકલી ફરિયાદી હાર્દિકભાઈ તથા તેની ફેમીલી અને કારખાનાને ઉડાવી દેવાની મોબાઈલ ફોનમાં ધમકી આપી હતી.
- text
આ ચકરારી પાર્સલ બૉમ્બ પ્રકરણનો ભેદ ઉકેલવાની કામગીરીમાં મોરબી પોલીસ અધિક્ષક, એસ આર ઓડેદરાની સુચના અન્વયે તથા નાયબ પોલીસ અધિક્ષક રાધીકા ભારાઇ સાહેબ મોરબી વિભાગ, ના માર્ગદર્શન હેઠળ પો.ઇન્સ. વી.બી. જાડેજા તથા પો.સબ ઇન્સ. એન.બી.ડાભી એલ સી,બી મોરબીનાઓ ટીમ સાથે તથા પો ઇન્સ. જે.એમ.આલ એસ ઓ જી મોરબીનાઓ ટીમ સાથે તથા સર્કલ પો.ઇન્સ. એચ.એન રાઠોડ સા. તથા વાંકાનેર તાલુકા પો.સબ.ઇન્સ, આર.પી. જાડેજા પોલીસ સ્ટાફ સાથે તથા પો.સબ ઇન્સ. બી ડી.પરમાર, ડોગ સ્કોડ વિગેરે અલગ અલગ ટીમો બનાવી ઉપરોક્ત આરોપીની અલગ અલગ દિશા માં ટીમો દ્વારા શોધખોળ કરવા ટેકનીસેલની મદદ પણ લેવામાં આવી હતી. અને પોલીસે ગણતરીની કલાકોમાં આરોપીને જી.આઇ.ડી.સી. કારખાના વિસ્તારમાંથી ઝડપી લીધો હતો.
- text
