ભૂકંપ બાદ 4થી લઈ 5.8ની તિવ્રતાના 72 આફ્ટર શોક આવ્યા
તાઈપેઈ : બુધવારે સવારે તાઈવાનના પૂર્વ કિનારે 7.4ની તીવ્રતાનો ભૂકંપ આવ્યો હતો. સ્થાનિક અધિકારીક વર્તુળોએ છેલ્લા 25 વર્ષમાં આ સૌથી મોટો ભૂકંપ હતો. ભૂકંપ બાદ તાઇવાન અને કેટલાક પડોશી દેશોના તટીય વિસ્તારોમાં સુનામીની ચેતવણી જારી કરવામાં આવી છે. ભૂકંપમાં ચાર લોકોએ જીવ ગુમાવ્યા છે અને ડઝનેક લોકો ઘાયલ થયા છે. ભૂકંપની તબાહી અંગે મોરબી સિરામિક એસોસીએશનના પૂર્વ પ્રમુખ નિલેશભાઈ જેતપરિયા સાથે તાઇવાનના વેપારીએ વાત કરી જણાવ્યું હતું કે, ભયાનક ભૂકંપ બાદ સતત આફ્ટર શોક ચાલુ રહ્યા છે અને સાંજ સુધીમાં 72 આફ્ટર શોક નોંધાયા છે જે 4થી લઈ 5.8ની તિવ્રતાના હતા.
મોરબી સિરામિકના અગ્રણી એક્સપોર્ટર નિલેશભાઈ જેતપરિયાએ જણાવ્યું હતું કે, તાઇવાનના વેપારીએ વર્તમાન સ્થિતિ અંગે જાણકારી આપતા જણાવ્યું હતું કે, ભૂકંપના કારણે પૂર્વ કિનારે હુઆલીનની મોટી ઇમારતોને નુકસાન થયું છે.આ સ્થળ ભૂકંપનું કેન્દ્ર હતું. આ વિસ્તારમાં બચાવ કામગીરી ચાલી રહી છે. આ ભૂકંપના આંચકાએ સમગ્ર તાઈવાનને હચમચાવી નાખ્યું હતું.
એસોસિએટેડ પ્રેસના જણાવ્યા અનુસાર, 7.2ની તીવ્રતાનો ભૂકંપ હુઆલીન શહેરથી 18 કિલોમીટર દૂર અને લગભગ 35 કિલોમીટરની ઊંડાઈએ આવ્યો હતો. યુએસ જીઓલોજિકલ સર્વેએ ભૂકંપની તીવ્રતા 7.4 નોંધી છે.મીડિયા અહેવાલો અનુસાર, પર્વતીય મધ્ય પૂર્વ કિનારે ભૂસ્ખલન સહિત 25 થી વધુ આફ્ટરશોક્સ અનુભવાયા હતા. તાઇવાનની રાષ્ટ્રીય અગ્નિશમન એજન્સીના જણાવ્યા અનુસાર, સવારે 8 વાગ્યાના ભૂકંપ બાદ હુઆલીન કાઉન્ટીમાં ચાર લોકોના મોત થયા હતા અને ઓછામાં ઓછા 57 લોકો ઘાયલ થયા હતા.
સ્થાનિક યુનાઈટેડ ડેઈલી ન્યૂઝે અહેવાલ આપ્યો છે કે ભૂકંપના કેન્દ્રની નજીકના તારોકો નેશનલ પાર્કમાં ખડક પડતાં ત્રણ લોકોના મોત થયા છે.આ ભૂકંપમાં 26 ઈમારતો ધરાશાયી થઈ ગઈ છે. 20થી વધુ લોકો તેમાં ફસાયા હોવાની આશંકા છે. તેમાં કહેવામાં આવ્યું છે કે આ લોકોને બચાવવા માટે બચાવ અભિયાન ચાલી રહ્યું છે.
તાઈવાનમાં સતત ભૂકંપના આંચકા અનુભવાઈ રહ્યા છે.જો કે 25 વર્ષમાં આ સૌથી મોટો ભૂકંપ હોવાનું કહેવાય છે.તાઈવાન ‘પેસિફિક રિંગ ઓફ ફાયર’ના પટ્ટામાં આવે છે. પેસિફિક રિંગ ઓફ ફાયર એ જ્વાળામુખી અને ધરતીકંપોનો પટ્ટો છે. આ પટ્ટો પ્રશાંત મહાસાગરને ઘેરે છે, જ્યાં વિશ્વમાં સૌથી વધુ ધરતીકંપો આવે છે. 1901 થી 2000 ની વચ્ચે તાઈવાનમાં 91 મોટા ભૂકંપ આવ્યા. દેશમાં પ્રારંભિક ચેતવણી પ્રણાલી પણ છે, જે ધરતીકંપને શોધી કાઢે છે અને તરત જ ચેતવણીઓ મોકલે છે.ફેબ્રુઆરી 2018 માં હુઆલિન અને છેલ્લે 6.4 તીવ્રતાનો ભૂકંપ આવ્યો હતો. આ ભૂકંપમાં 17 લોકોના મોત થયા હતા.
