- text
રાજ્ય સરકારે 60 લાખ સ્માર્ટ મીટરનો ઓર્ડર આપ્યો : પ્રથમ તબક્કે સરકારી કચેરીઓમાં લાગશે સ્માર્ટ મીટર
મોરબી : ટૂંક સમયમાં રાજ્યભરના ઘરોમાં સ્માર્ટ વીજ મીટર લાગશે, રાજ્ય સરકારે 60 લાખ સ્માર્ટ મીટરનો ઓર્ડર આપ્યો છે. પ્રથમ તબક્કામાં આ વીજ મીટર ગાંધીનગરની સરકારી કચેરીઓ અને રાજ્યભરની અન્ય સરકારી કચેરીઓમાં લગાવવામાં આવશે. મીટરની કાર્યક્ષમતા ચકાસ્યા બાદ ખાનગી મિલકતોમાં ઇન્સ્ટોલ કરવામાં આવશે.જે બાદમાં ઘરેલુ ગ્રાહકો માટે સ્થાપિત કરવામાં આવશે. ઇન્સ્ટોલેશન તબક્કાવાર હાથ ધરવામાં આવશે. શરૂઆતમાં મોટા શહેરોમાં સ્માર્ટ વીજ મીટર લગાવવામાં આવશે.
અમદાવાદ મિરરના અહેવાલ મુજબ સ્માર્ટ મીટર વેબ-આધારિત મોનિટરિંગ સિસ્ટમ દ્વારા જોડાયેલા છે જે યુટિલિટીઝના કોમર્શિયલ નુકસાનને ઘટાડવામાં, આવક વધારવામાં અને પાવર સેક્ટરના સુધારામાં એક મહત્વપૂર્ણ સાધન તરીકે સેવા આપવા માટે મદદ કરશે. એક અધિકારીએ જણાવ્યું કે, આ ટ્રાન્સમિશન અને ડિસ્ટ્રિબ્યુશન લોસ ઘટાડવામાં મદદ કરે છે.એનર્જી એફિશિયન્સી સર્વિસીસ લિમિટેડ (EESL), જે રાજ્ય સંચાલિત વીજ કંપનીઓનું જોઈન્ટ વેન્ચર છે, હાલમાં વિતરણ કંપનીઓ (DISCOMs)ની બિલિંગ અને સંગ્રહ કાર્યક્ષમતામાં નોંધપાત્ર સુધારો કરવા સ્માર્ટ મીટરિંગ પ્રોગ્રામનો અમલ કરી રહી છે. રિપોર્ટ અનુસાર સ્માર્ટ મીટરની ખાસ વાત એ છે કે તેને મોબાઈલ ટીવીની જેમ રિચાર્જ કરવું પડશે, જેટલું રિચાર્જ થશે તેટલી વીજળી મળશે.
- text
સ્માર્ટ મીટર સિસ્ટમ દ્વારા સરકાર સ્માર્ટ ગ્રીડ પ્રોગ્રામ માટે પાયો તૈયાર કરવા માગે છે જે નવા વિકસતા ઊર્જા મિશ્રણના પડકારોને પહોંચી વળવા અને અવિરત 24×7 વીજ પુરવઠો પૂરો પાડવાના લક્ષ્યાંકને પહોંચી વળવા માટે નિર્ણાયક બનશે. કેન્દ્ર સરકારે તેની સુધારેલી વિતરણ ક્ષેત્ર યોજના (RDSS) હેઠળ માર્ચ, 2025 સુધી તમામ સ્થાનિક ગ્રાહકો માટે 25 કરોડથી વધુ સ્માર્ટ પ્રીપેડ મીટર સ્થાપિત કરવાની યોજના બનાવી છે.
- text
