- text
ઠીકરીયાળી ગામે ભત્રીજાને લેવા જઈ રહેલા થાનગઢના રીક્ષા ચાલકનું મૃત્યુ, અન્ય ત્રણ મુસાફરોને ઇજા
વાંકાનેર : વાંકાનેર બાઉન્ડ્રી નજીક ઠીકરિયાળી ગામના પાટિયા પાસે મહાસાગર ટ્રાવેલ્સની બસે સીએનજી રીક્ષા અને સ્કોર્પિયો કારને હડફેટે લઈ અકસ્માત સર્જતાં આ ત્રિપલ અકસ્માતમા રીક્ષા ચાલક યુવાનનું મૃત્યુ નીપજ્યું હતું.જ્યારે અન્ય ત્રણ મુસાફરોને ઇજાઓ પહોચી હતી. ગંભીર અકસ્માત સર્જ્યા બાદ ટ્રાવેલ્સ બસનો ચાલક ફરાર થઇ ગયો હતો.
- text
બનાવ અંગે જાણવા મળતી વિગતો મુજબ સુરેન્દ્રનગર જિલ્લાના થાનગઢ ગામે રહેતા જયેશભાઇ ગોવિંદભાઇ સરવૈયા પાડોશીની સીએનજી રીક્ષા લઈ પોતાના ભત્રીજા અને અન્ય પાડોશીઓ સાથે કાલાવડ તાલુકાના નિકાવા ગામે પીરના દર્શન કરી પરત આવી રહ્યા હતા ત્યારે જયેશભાઇએ તેમના ભત્રીજાને વાંકાનેર તાલુકાના ઠીકરિયાળી ગામે રહેતા બહેનના ઘેર મુક્યો હોય લેવા જતા હતા ત્યારે બાઉન્ડ્રી નજીક મહાસાગર ટ્રાવેલ્સની બસ નંબર જીજે – 03 – બીટી – 9033ના ચાલકે ઠીકરિયાળી ગામના પાટિયા પાસે રીક્ષાને હડફેટે લઈ અકસ્માત સર્જ્યો હતો. આ અકસ્માત સમયે જ લકઝરી બસના ચાલકે અન્ય સ્કોર્પિયો ગાડીને પણ હડફેટે લઈ લેતા ત્રિપલ અકસ્માતમાં રીક્ષા ચાલક જયેશભાઈનું બનાવ સ્થળે જ મૃત્યુ નીપજ્યું હતું. જ્યારે રીક્ષામાં બેઠેલા અશ્વિનભાઈ અને અન્ય બે મહિલાઓને ઇજાઓ પહોંચી હતી. જો કે અકસ્માત સર્જ્યા બાદ લકઝરી બસનો ચાલક રાજકોટ તરફ નાસી જતા મૃતકના ભાઈ મહાદેવભાઈ ગોવિંદભાઇ સરવૈયાએ બસ ચાલક વિરુદ્ધ વાંકાનેર તાલુકા પોલીસ મથકમાં ફરિયાદ નોંધાવતા પોલીસે ગુન્હો નોંધી તપાસ શરૂ કરી છે.
- text
