- text
શેરીમાં પાણી નીકળવા મામલે જીવલેણ હુમલો કરતા યુવાને રાજકોટમાં દમ તોડ્યો
મોરબી : માળીયા મિયાણા તાલુકાના મોટા દહીંસરા ગામે શેરીમાં પાણી નીકળવા મામલે પાડોશમાં રહેતા ચાર શખ્સોએ યુવાન સાથે બોલાચાલી કર્યા બાદ લોખંડના પાઇપ અને ધોકા વડે બેફામ માર મારતા ઇજા પામેલા યુવાનને સારવાર માટે રાજકોટ ખસેડવામાં આવતા સારવાર દરમિયાન યુવાને દમ તોડી દેતા બનાવ હત્યામાં પલટાયો છે.
- text
પ્રાપ્ત વિગતો મુજબ ગત તા.10ના રોજ માળીયા તાલુકાના મોટા દહીંસરા ગામે રહેતા ચંદુભાઈ છગનભાઇ મકવાણા ઉ.40 નામના યુવાન સાથે પાડોશમાં રહેતા આરોપી સુરેશ અવચરભાઈ ઇન્દરિયા, અરુણ અવચરભાઈ ઇન્દરિયા, વિજય અવચરભાઈ ઇન્દરિયા અને અશોક અવચરભાઈ ઇન્દરિયા નામના શખ્સોએ શેરીમાં નીકળતા પાણી મામલે ઝઘડો કરી લોખંડના પાઇપ ધોકા વડે હુમલો કરતા વચ્ચે બચાવવા પડેલા મહાદેવભાઈને પણ આરોપીઓએ કપાળના ભાગે ઇજાઓ કરી હતી.બીજી તરફ ગંભીર ઇજા પામેલા ચંદુભાઈને સારવાર માટે રાજકોટ ખસેડવામાં આવ્યા હતા જ્યાં સારવારમાં તેઓએ દમ તોડી દેતા બનાવ હત્યામાં પલટાયો છે. આ બનાવ મામલે મૃતકના પત્ની નિર્મળાબેને ફરિયાદ નોંધાવતા પોલીસે ગુન્હો નોંધી તપાસ શરૂ કરી છે.
- text
