- text
વાંકાનેર નેશનલ હાઇવે ઉપર લાલપર નજીક પિતા પુત્રીને ડમ્પર ચાલકે હડફેટે લીધા
મોરબી : મોરબી જિલ્લામાં અકસ્માતોના બનાવો વધી રહ્યા છે ત્યારે ગઈકાલે ઉંચી માંડલ નજીક બાઈક ઉપર જઈ રહેલા યુવાનને અજાણ્યા ટ્રક ટ્રેઇલર ચાલકે પાછળથી હડફેટે લઈ ગંભીર ઇજાઓ પહોચાડતા સ્થળ ઉપર જ મૃત્યુ નીપજ્યું હતું. જ્યારે બીજા બનાવમાં ભાણેજની તબિયત જોવા વાંકાનેરના મહિકા ગામે એક્સેસ મોટર સાયકલ લઈને જતા પિતા અને પુત્રીને અજાણ્યા ડમ્પર ચાલકે હડફેટે લઈ ઇજાઓ પહોંચાડતા મોરબી તાલુકા પોલીસે બન્ને અકસ્માતના બનાવમાં ફરિયાદ નોંધાઇ છે.
પ્રાપ્ત વિગતો મુજબ મોરબી તાલુકાના નીચી માંડલ ખાતે આવેલ ઇટાલસ સિરામિક કારખાનામાં ટાઇલ્સ લગાવવાનું કામ કરી બાઈક ઉપર વાવડી ગામે ઘેર પરત આવી રહેલા હર્ષદભાઈ છગનભાઇ ટાકને ઉંચી માંડલ નજીક અજાણ્યા ટ્રક ટ્રેઇલર ચાલકે પાછળથી હડફેટે લઈ અકસ્માત સર્જી ગંભીર ઇજાઓ પહોંચાડતા સ્થળ ઉપર જ હર્ષદભાઈનું મૃત્યુ નીપજતા તેમના ભાઈ નિખિલભાઈએ અકસ્માત સર્જી નાસી ગયેલ ટ્રક ટ્રેઇલર ચાલક વિરુદ્ધ ફરિયાદ નોંધાવી હતી.
- text
જ્યારે બીજા બનાવમાં વાંકાનેર – મોરબી હાઇવે ઉપર એક્સેસ મોટર સાયકલ લઈને જઈ રહેલા ધનજીભાઈ દેવજીભાઈ જાદવ અને તેમની પુત્રી દુર્ગાબેન રહે.મારુતિ પ્લોટ, સો ઓરડી મોરબી વાળા વાંકાનેરના મહિકા ગામે ભાણેજ રોહિતની ખબર પૂછવા જતા હતા ત્યારે અજાણ્યા ડમ્પર ચાલકે લાલપર નજીક મોટર સાયકલની પાછળ ઠોકર મારતા પિતા અને પુત્રીને ઇજાઓ પહોંચતા અકસ્માતના બનાવ અંગે મોરબી તાલુકા પોલીસ મથકમાં અજાણ્યા ડમ્પર ચાલક વિરુદ્ધ ફરિયાદ નોંધાવી હતી.
- text
