સદભાવના હોસ્પિટલના દંત ચિકિત્સક ડો. કોમલ દવેએ બાળકોના દાંતનું ઝીણવટભર્યું નિરીક્ષણ કરી દાંતની સ્વચ્છતા અને આરોગ્ય માર્ગદર્શન આપ્યુંમોરબી અપડેટ : મોરબીની વજેપરવાડી સરકારી પ્રાથમિક શાળામાં શિશુ વર્ગના બાળકો (બાકી રહેલા વર્ગખંડો) માટે તારીખ 29/07/2026 ના રોજ એક વિશેષ ‘ડેન્ટલ અને ઓરલ હાઈજીન કેમ્પ’ નું આયોજન કરવામાં આવ્યું હતું.આ કેમ્પમાં મોરબીની પ્રતિષ્ઠિત સદભાવના ચેરિટેબલ ટ્રસ્ટ હોસ્પિટલના દંત ચિકિત્સક ડો. કોમલ સુરેશચંદ્ર દવે દ્વારા શાળાના નાના બાળકોના દાંતનું ઝીણવટભર્યું નિરીક્ષણ અને પરીક્ષણ કરવામાં આવ્યું હતું. કેમ્પ દરમિયાન ડો. કોમલ દવેએ બાળકોને દાંતની સફાઈ અને મોંની તંદુરસ્તી જાળવવા માટેનું યોગ્ય માર્ગદર્શન પૂરું પાડ્યું હતું.ડો. કોમલ દવે દ્વારા જણાવાયું હતું કે બાળકોના સર્વાંગી વિકાસ માટે માત્ર ભણતર જ નહીં, પરંતુ તેમનું સ્વાસ્થ્ય પણ એટલું જ મહત્વનું હોય છે. આજના સમયમાં ફાસ્ટ ફૂડ અને ચોકલેટના વધુ પડતા સેવનને કારણે નાના બાળકોમાં નાની ઉંમરે જ દાંતનો સડો (કેવિટી) અને પેઢાના રોગોનું પ્રમાણ વધી રહ્યું છે, જે ચિંતાનો વિષય છે.આ સમસ્યાના નિવારણ માટે તેમણે બાળકોને દાંતની સુરક્ષાના ખાસ નિયમો સમજાવ્યા હતા. પ્રેક્ટિકલ ડેમો આપીને બ્રશ કરવાની સાચી પદ્ધતિ શીખવી હતી અને જણાવ્યું હતું કે સવારે ઉઠીને અને રાત્રે સૂતા પહેલાં એમ દિવસમાં બે વાર બ્રશ કરવું અત્યંત અનિવાર્ય છે. વધુમાં, કોઈપણ ચીજવસ્તુ ખાધા પછી મોં ચોખ્ખા પાણીથી સાફ કરવાની અને કોગળા કરવાની ટેવ રાખવાથી દાંત લાંબા સમય સુધી મજબૂત અને સ્વસ્થ રહે છે.ડો. કોમલ દવેએ પોતાના તબીબી અનુભવના આધારે દ્રઢ વિશ્વાસ વ્યક્ત કર્યો હતો કે જો નાનપણથી જ બાળકોને ઓરલ હાઈજીન પ્રત્યે જાગૃત કરવામાં આવે, તો ભવિષ્યમાં મોટી ઉંમરે થતી દાંતની ગંભીર સમસ્યાઓથી 90 ટકા સુધી બચી શકાય છે. તેમણે જણાવ્યું હતું કે માત્ર બ્રશ કરવું પૂરતું નથી પરંતુ જીભની સફાઈ (Tongue cleaning) કરવી અને પેઢા પર હળવા હાથે મસાજ કરવો પણ જરૂરી છે, જેથી મોંમાંથી આવતી દુર્ગંધ અને બેક્ટેરિયાને અટકાવી શકાય.વધુમાં તેમણે વાલીઓ અને બાળકોને ચોકલેટ આઈસ્ક્રીમ જેવી વસ્તુ ખાધા પછી મોં સાફ કરવા માટે જણાવ્યું હતું. અને દાંતને મજબૂત રાખવા માટે કેલ્શિયમ અને વિટામિન-સી યુક્ત ખોરાક જેવા કે દૂધ, લીલા શાકભાજી અને ફળોનો રોજિંદા આહારમાં ઉપયોગ કરવો જોઈએ તેમજ દર 6 મહિને એકવાર દંત ચિકિત્સક પાસે નિયમિત ચેકઅપ કરાવવાનો આગ્રહ રાખવો જોઈએ તેવી વાલીઓ અને બાળકોને અપીલ કરવામાં આવી હતી.#Morbi #MorbiNews #VajeperwadiSchool #DentalCamp #OralHygiene #DrKomalDave #SadbhavanaHospital #HealthCamp #Gujarat
.jpg)
