કાઉન્સિલર ભુપત જારીયા સહિતના આગેવાનોએ કરી રજૂઆત : સ્ટ્રીટ લાઈટ, સિમેન્ટ રોડ, રસ્તો પહોળો કરવા અને દબાણ હટાવવા સહિતના 5 મુખ્ય પ્રશ્નો અંગે પાઠવ્યું આવેદનપત્રમોરબી: મોરબીના વિદ્યુત નગર સોસાયટી વિસ્તારમાં લાંબા સમયથી પડતર પ્રાથમિક સુવિધાઓના પ્રશ્નો અંગે સ્થાનિક રહીશો દ્વારા મોરબી મહાનગરપાલિકામાં લેખિત રજૂઆત કરવામાં આવી છે. વોર્ડ નંબર 3 ના સ્થાનિક કાઉન્સિલર ભુપત જારીયા અને વિસ્તારના અન્ય અગ્રણીઓની આગેવાનીમાં મહાનગરપાલિકાના તંત્રને રૂબરૂ મળીને સ્થાનિકોની હાલાકીનો તાત્કાલિક ધોરણે ઉકેલ લાવવા માટે મજબૂત માંગ કરવામાં આવી છે.સ્થાનિક રહીશો દ્વારા કરવામાં આવેલી રજૂઆતમાં મુખ્ય 5 પ્રશ્નો ઉઠાવવામાં આવ્યા છે, જેમાં પ્રથમ પ્રશ્ન વિદ્યુત નગર સોસાયટી તેમજ આંતરિક શેરીઓમાં સ્ટ્રીટ લાઈટની પૂરતી વ્યવસ્થા કરવા બાબતે છે. અહીં લાઈટોના અભાવે રાત્રિના સમયે ભારે અંધકાર રહે છે, જેના કારણે અકસ્માત, ચોરી અને અસામાજિક પ્રવૃત્તિઓનો ભય સતત રહે છે અને ખાસ કરીને મહિલાઓ, વૃદ્ધો તથા બાળકોને મુશ્કેલી પડે છે. આ સાથે જ, સોસાયટીની શેરી નંબર 1 અને 2 બંને શેરીઓમાં રોડની હાલત અત્યંત ખરાબ થઈ ગઈ હોવાથી ચોમાસામાં કાદવ અને પાણી ભરાઈ જાય છે. આ બિસ્માર રસ્તાના કારણે વાહનચાલકો અને રહીશોની રોજિંદી અવરજવર જોખમી બનતી હોવાથી ત્યાં તાત્કાલિક ગુણવત્તાસભર સિમેન્ટ રોડ બનાવવાની માંગ કરાઈ છે.વધુમાં, વિદ્યુત નગર તેમજ હરી પાર્ક બ્રહ્મસમાજ સોસાયટીના મેઈન પ્રવેશ રોડ પર ફાયર સ્ટેશન બાજુમાં આવેલો રસ્તો ખૂબ સાંકડો હોવાથી ભારે ટ્રાફિક સર્જાય છે અને અકસ્માતની શક્યતા રહે છે, જેથી આ રસ્તાને યોગ્ય માપદંડ મુજબ વહેલી તકે પહોળો કરવો જરૂરી બન્યો છે. તેમજ ફાયર સ્ટેશનની પાછળ આવેલી સરકારી જમીન પર થયેલા ગેરકાયદેસર દબાણો અને અનધિકૃત બાંધકામોના કારણે જાહેર હિતના કામોમાં અવરોધ ઊભો થતો હોવાથી, આ કબ્જો દૂર કરવા માટે તાત્કાલિક તપાસ કરી નિયમ મુજબ ડિમોલેશનની કાર્યવાહી કરવાની સ્પષ્ટ માંગણી કરવામાં આવી છે.આ ઉપરાંત, સોસાયટીના કોમન પ્લોટમાં પેવર બ્લોક નાખવામાં આવે તો નવરાત્રી, ગણપતિ ઉત્સવ, હોલિકા દહન અને કૃષ્ણ જન્મોત્સવ જેવા ધાર્મિક અને સામાજિક પ્રસંગોમાં સ્થાનિકોને કાર્યક્રમો કરવામાં મોટી સરળતા રહે તેમ છે.આ આવેદનપત્રની નકલ મોરબી મહાનગરપાલિકાના કમિશનર, ડેપ્યુટી કમિશનર, ટાઉનપ્લાનિંગ વિભાગ, સ્ટ્રીટ લાઈટ વિભાગ અને દબાણ શાખા વિભાગને પણ યોગ્ય કાર્યવાહી અર્થે મોકલી આપવામાં આવી છે. સોસાયટીના સમસ્ત રહીશોએ આશા વ્યક્ત કરી છે કે તંત્ર દ્વારા લોકહિતમાં આ તમામ પ્રાથમિક પ્રશ્નો અંગે ઝડપથી યોગ્ય નિર્ણય લઈ વિસ્તારના લોકોને મોટી રાહત આપવામાં આવશે.#Morbi #MorbiUpdate #MorbiMahanagarpalika #PublicIssues #VidyutNagar #BhupatJariya #DevelopmentWork #MorbiNews
.jpg)
