મોરબી : ગુજરાતમાં ધોરણ 10 બોર્ડની પરીક્ષાઓ પૂર્ણ થઈ ગઈ છે. છેલ્લું પેપર પૂરું થતાં જ પરીક્ષા કેન્દ્રોની બહાર નીકળતા વિદ્યાર્થીઓના ચહેરા પર એક અલગ જ ખુશી જોવા મળી હતી. જાણે માથેથી કોઈ મોટો બોજ ઉતરી ગયો હોય તેવી રાહત વિદ્યાર્થીઓ અનુભવી રહ્યા હતા. પરીક્ષા બાદ વિદ્યાર્થીઓનું પેપર કેવું ગયું અને તેમના આગામી વેકેશનના શું પ્લાન છે તે જાણવાનો પ્રયાસ મોરબી અપડેટ દ્વારા કરવામાં આવ્યો હતો, જેમાં વિદ્યાર્થીઓએ કેટલાક રમુજી તો કેટલાક પ્રેરણાદાયક જવાબો આપ્યા હતા.મોટાભાગના વિદ્યાર્થીઓએ જણાવ્યું હતું કે, તેમના પેપર ખૂબ સારા ગયા છે અને તેઓ ખુશ છે. એક વિદ્યાર્થીએ તો 90+ માર્ક્સ આવવાની આશા વ્યક્ત કરી હતી, જ્યારે અન્ય એક વિદ્યાર્થીએ કહ્યું કે 80% જેટલા આવી જશે. એક વિદ્યાર્થિનીએ જણાવ્યું કે પેપર એટલું સહેલું હતું કે તેણે ધાર્યા કરતાં પણ વધારે વાંચી લીધું હતું. તો તેની સામે એક નિખાલસ વિદ્યાર્થીએ રમુજી અંદાજમાં કહ્યું કે રિઝલ્ટ વિશે કંઈ કહેવું નથી, બસ પાસ થઈ જવાની આશા છે!વેકેશનના પ્લાન વિશે પૂછતાં વિદ્યાર્થીઓએ જાતભાતના જવાબો આપ્યા હતા. એક વિદ્યાર્થીએ હસતા હસતા કહ્યું કે, 'વેકેશનમાં રખડવાનો જ પ્લાન હોય ને, બીજો શું હોય!' જ્યારે એકે ટીખળ કરતા કહ્યું કે 'નાનીના ઘરે જઈશું, જો ત્યાં યુદ્ધ ન થાય તો!' અમુક વિદ્યાર્થીઓએ કહ્યું કે તેઓ આખો દિવસ મોબાઈલ જોશે અને ઘરે જ આરામ કરશે.આ રમુજી જવાબો વચ્ચે કેટલાક વિદ્યાર્થીઓએ પોતાના ઉજ્જવળ ભવિષ્ય માટેની તૈયારીઓ વિશે પણ વાત કરી હતી. એક વિદ્યાર્થિનીએ જણાવ્યું કે, તે વેકેશનમાં ઓનલાઇન જોબ કરશે જેથી અત્યારથી જ કમાતા શીખી શકાય અને પરિવારને મદદરૂપ થઈ શકાય. અન્ય એક વિદ્યાર્થિનીએ ધોરણ 11-12માં આર્ટ્સ રાખીને ભવિષ્યમાં UPSC ની તૈયારી કરવાનો પોતાનો સ્પષ્ટ ધ્યેય વ્યક્ત કર્યો હતો. તો વળી કેટલાક વિદ્યાર્થીઓએ વેકેશનમાં કામે (નોકરીએ) જવાની પણ વાત કરી હતી.એકંદરે, બોર્ડની પરીક્ષાના લાંબા તણાવમાંથી મુક્ત થયેલા વિદ્યાર્થીઓ હવે અલગ અલગ રીતે પોતાના ઉનાળુ વેકેશનની મજા માણવા માટે સંપૂર્ણપણે તૈયાર જોવા મળી રહ્યા છે.#Morbi #MorbiUpdate #MorbiNews #BoardExams #Class10 #GujaratEducation #SummerVacation #StudentReactions #StudentsLife #YouthOfGujarat
.jpg)
