મોરબી : મોરબી જિલ્લા મહિલા અને બાળ અધિકારીની કચેરી દ્વારા ‘બેટી બચાવો, બેટી પઢાવો’ યોજના અંતર્ગત રમતગમત ક્ષેત્રે ઉત્કૃષ્ટ પ્રદર્શન કરનાર દીકરીઓને પ્રોત્સાહિત કરવા માટે એક વિશેષ સન્માન સમારોહનું આયોજન કરવામાં આવ્યું હતું. આ કાર્યક્રમમાં જિલ્લાની કુલ 48 જેટલી તેજસ્વી દીકરીઓનું મહાનુભાવોના હસ્તે બહુમાન કરવામાં આવ્યું હતું.મોરબી જિલ્લા કલેક્ટર કે.બી. ઝવેરીના અધ્યક્ષસ્થાને અને મોરબી મ્યુનિસિપલ કમિશનર સ્વપ્નિલ ખરેની પ્રેરક ઉપસ્થિતિમાં આ સન્માન સમારોહ યોજાયો હતો. જેમાં કબડ્ડી, કરાટે, જુડો, ટેકવેન્ડો, ખો-ખો અને બેડમિન્ટન જેવી વિવિધ રમતોમાં રાજ્ય અને રાષ્ટ્રીય કક્ષાએ શ્રેષ્ઠ દેખાવ કરનાર ખેલાડી કન્યાઓને સ્મૃતિચિહ્ન અને પ્રશસ્તિપત્ર આપી નવાજવામાં આવી હતી.આ તકે કલેક્ટર કે.બી. ઝવેરીએ દીકરીઓને અભિનંદન પાઠવતા જણાવ્યું હતું કે, મોરબીની દીકરીઓ રમતગમતના મેદાનમાં પોતાની આગવી ઓળખ ઉભી કરી રહી છે, જે સમગ્ર જિલ્લા માટે ગૌરવની બાબત છે. મ્યુનિસિપલ કમિશનર સ્વપ્નિલ ખરેએ પણ દીકરીઓને રમતગમતની સાથે શિક્ષણમાં પણ ઉચ્ચ શિખરો સર કરવા માટે પ્રોત્સાહિત કરી હતી.આ કાર્યક્રમમાં જિલ્લા મહિલા અને બાળ અધિકારી જલ્પાબેન ત્રિવેદી, જિલ્લા રમતગમત અધિકારી રવિભાઈ રાઠોડ, વિવિધ રમતના કોચ, વાલીઓ તેમજ મોટી સંખ્યામાં દીકરીઓ ઉપસ્થિત રહી હતી. વહીવટી તંત્રના આ હકારાત્મક અભિગમથી જિલ્લાની અન્ય દીકરીઓને પણ રમતગમત ક્ષેત્રે આગળ વધવાની નવી પ્રેરણા મળશે.#Morbi #MorbiUpdate #BetiBachaoBetiPadhao #SportsNews #GirlPower #FelicitationProgram #GujaratSports #TalentedDaughters
.jpg)
