ચારેય રસ્તા પર ચક્કાજામ, વાહનોની લાંબી લાઈનો લાગીમોરબી : મોરબીના નવલખી બંદરે વે-બ્રિજના ભાવ ઘટાડવા અને પ્રાથમિક સુવિધાઓ પૂરી પાડવા બાબતે આજ રોજ નવલખી ટ્રક ટ્રાન્સપોર્ટ એસોસિએશન દ્વારા પીપળીયા ચાર રસ્તા પર ચક્કાજામ કરવામાં આવ્યો હતો. મોટી સંખ્યામાં ટ્રક ટ્રાન્સપોર્ટ એસોસિએશનના લોકો એકઠાં થયા હતા અને રસ્તો રોકીને સૂત્રોચ્ચાર કરવામાં આવ્યા હતા. ચક્કાજામના કારણે પીપળીયા ચાર રસ્તા પર મોરબી, નવલખી, માળિયા અને જામનગર જવાના ચારેય રસ્તા પર ટ્રાફિકજામ થઈ ગયો હતો. ઘટનાની જાણ થતાં જ માળિયા અને મોરબી તાલુકા પીઆઈ સહિતનો પોલીસ સ્ટાફ ઘટના સ્થળે પહોંચ્યો હતો અને ટ્રાફિક હળવો કરાવવા પ્રયત્નો કર્યા હતા. ચક્કાજામના પગલે ચારેય બાજુના રસ્તા પર 3 કિલોમીટરથી વધુ લાંબો ટ્રાફિકજામ થયો છે. જો કે પોલીસે મધ્યસ્થી કરતાં પોર્ટ અધિકારીઓએ થોડા સમયમાં સ્થળ પર આવવાની ખાતરી આપી હતી જેથી પોલીસે ટ્રાફિકજામ હળવો કરવાની કાર્યવાહી હાથ ધરી છે.આ અંગે મોરબી અપડેટ સાથેની વાતચીતમાં રમેશભાઈ આહીરે જણાવ્યું કે, અમારું આ આંદોલન નવલખી પોર્ટ પર વે-બ્રિજના ભાવ ઘટાડા માટે છે. કેમ કે પોર્ટની અંદર રોડ રસ્તા સહિતની કોઈ સુવિધાઓ આપવામાં આવતી નથી. આ ઉપરાંતપાણીની સુવિધા નથી, કેન્ટીન નથી આમ ઘણી બધી સમસ્યાઓ છે. આ અંગે અમે ગાંધીનગર સુધી રજૂઆતો કરી છે. પરંતુ અંતે નાછુટકે અમારે રસ્તા રોકો આંદોલન કરવું પડ્યું છે. જો હજું પણ માગણીઓ પૂરી કરવામાં નહીં આવે તો તમામ ટ્રક ટ્રાન્સપોર્ટ એસોસિએશનના લોકો નવલખી ગેટ પર બેસીને ભુખ હડતાળ પર ઉતરીશું. દરરોજ 1000 જેટલા ટ્રકો ચાલે છે અને દરેક ટ્રક પેટે 450 રૂપિયા વે-બ્રિજના લેવામાં આવે છે. અમારી માગણી છે કે 450માંથી ઘટાડીને 250 રૂપિયા કરવામાં આવે. ગુજરાત મેરિટાઈમ બોર્ડનો કાંટો હતો તે કાઢી નાખવામાં આવ્યો છે તે ફરીથી ચાલુ કરવા અમારી માગણી છે. જ્યાં સુધી કોઈ અધિકારી આવીને અમારી માગણી નહીં પૂરી કરી ત્યાં સુધી આ આંદોલન ચાલુ રહેશે.આ અંગે સ્થળ પર ઉપસ્થિત મોરબી જિલ્લા કોંગ્રેસ પ્રમુખ કિશોરભાઈ ચિખલીયાએ મોરબી અપડેટ સાથેની વાતચીતમાં કહ્યું હતું કે, છેલ્લા ઘણા સમયથી નવલખી ટ્રક ટ્રાન્સપોર્ટ એસોસિએશન દ્વારા રાજ્ય સરકાર અને પોર્ટ ઓફિસરને પોતાની માગણીઓ અંગે રજૂઆતો કરી રહ્યા છે. નવલખી પોર્ટ પર કાંટા પર બેફામ રીતે ટ્રક માલિકો પાસેથી લૂંટ ચલાવવામાં આવી રહી છે. કાંટામાં ખરાબી થાય તો ટ્રક માલિકો પર ગુનો દાખલ કરવામાં આવે છે. આમ કાંટાના સંચાલકો ટ્રક માલિકોને હેરાન કરી રહ્યા છે.
.jpg)
