મોરબી : મોરબીના ચકચારી વજેપર રેવન્યુ સર્વે નંબર 602ની કરોડોની કિંમતી ખેતીની જમીન ગેરકાયદેસર રીતે વારસાઈ નોંધ કરાવી બાદમાં દસ્તાવેજ કરી પચાવી પાડવાના પ્રકરણમાં મુખ્ય સૂત્રધાર સાગર ફુલતરિયાની દિલ્હીથી ધરપકડ બાદ બુધવારે સીઆઇડી ક્રાઇમે વધુ એકની ધરપકડ કરી સમગ્ર પ્રકરણમાં મામલતદાર અને ડેપ્યુટી કલેકટર કચેરીમાં આર્થિક વ્યવહારો થયા છે જે નહીં તે બાબતે પણ તપાસ કરવામાં આવશે તેમ સીઆઇડીના અધિકારીએ જણાવ્યું હતું. મોરબીના વજેપરમાં સર્વે નંબર 602ની કરોડોની કિંમતી જમીન બોગસ ડોક્યુમેન્ટના આધારે વારસાઈ નોંધ કરાવી હડપ કરવા મામલે મોરબી શહેર એ ડિવીઝન પોલીસ મથકમાં શાંતાબહેન મનજીભાઈ પરમાર અને તરઘરી ગામના સરપંચ સાગર અંબારામ ફુલતરિયા સહિતના લોકો વિરુદ્ધ ફરિયાદ નોંધાઈ હતી. જેમાં અગાઉ સીઆઇડી ક્રાઈમ દ્વારા આરોપી ભરત દેગામા અને હેતલ ભોરણીયાની ધરપકડ કરવામાં આવી હતી. ત્યારબાદ શાંતાબેન મનજીભાઇ પરમાર રહે. લાભનગર, વેજીટેબલ રોડ, મોરબી અને સાગર નવઘણભાઇ સાવધાર રહે. રબારીવાસ, મોરબીવાળાની ધરપકડ કરાઈ હતી. અને છેલ્લે મુખ્ય આરોપી તરઘરીના સરપંચ સાગર ફુલતરીયાની દિલ્હીથી ધરપકડ કરવામાં આવી હતી. હાલમાં આ પ્રકરણમાં સીઆઇડી દ્વારા આજે બુધવારે વધુ એક આરોપી તરીકે અતુલ જોશીની ધરપકડ કરવામાં આવી છે. તપાસનીશ અધિકારી ડીવાયએસપી આર.એસ.પટેલે જણાવ્યું હતું કે આ પ્રકરણમાં આ છઠા આરોપીની ધરપકડ કરવામાં આવી છે. હવે આ કેસમાં વારસાઈ નોંધ પડાવવા સહિતની કામગીરીમાં મામલતદાર, ડેપ્યુટી કલેકટર કચેરી સાથે આર્થિક વ્યવહાર કર્યા છે કે, કેમ તે સહિતની બાબતે તપાસ કરવામાં આવશે.
.jpg)
