દોઢ મહિના સુધી ચાલે તેટલો પાણીનો જથ્થો ડેમમાં ઉપલબ્ધ રખાશે, એટલે પાણીની કોઈ તકલીફ નહિ સર્જાઈ, પાણી ઓછું અને ધીમી ગતિએ છોડવામાં આવતું હોવાથી બેઠો પુલ નહિ ડૂબે તેવી શકયતામોરબી : મોરબીના મચ્છુ-2 ડેમમાં દરવાજા બદલવાની કામગીરી કરવાની હોવાથી તેના 2 દરવાજા ખોલી પાણી છોડવાનું શરૂ કરવામાં આવ્યું છે. બે દિવસ સુધી આ પ્રક્રિયા ચાલુ રહેશે. બીજી તરફ ડેમમાં દોઢ મહિના સુધી ચાલે તેટલો પાણીનો જથ્થો ઉપલબ્ધ રખાશે. આ અંગે વિગતો આપતા મચ્છુ 2 ડેમના સેક્સન ઓફિસર પી.સી.પનારાએ જણાવ્યું કે મચ્છુ-2 ડેમના 9 અને 10 નંબરના બે દરવાજા એક-એક ફૂટ સુધી ખોલાયા છે. હાલ 1308 ક્યુસેક પાણી જઈ રહ્યું છે. સાંજે વધુ એક-એક ફૂટ દરવાજા ખોલવામાં આવશે. હાલ ડેમમાં 30 ટકા એટલે કે 939 એમસીએફટી પાણીનો જથ્થો ઉપલબ્ધ છે. જેમાંથી 390 એમસીએફટી પાણી નદીમાં છોડવામાં આવશે. જેથી ડેમમાં 549 એમસીએફટી પાણી રહેશે. મોરબી શહેર અને આજુબાજુના ગામોનો દરરોજ 3.4 એમસીએફટી જેટલા પાણીનો ઉપાડ છે. દોઢ મહિના સુધી પાણીની કોઈ તકલીફ નહિ થાય. એક મહિના સુધી તો ગ્રેવીટી ફોર્સથી જ પાણી મળશે. ત્યારબાદ પમ્પિંગ કરી પાણી પૂરું પાડવામાં આવશે.15 મેં આજુબાજુ નર્મદા કેનાલ શરૂ થઈ જશે. ત્યાં સુધી ડેમમાં પાણી ઉપલબ્ધ છે. ડેમમાં 38 ગેટ છે. જેમાં ગઈ વખતે 5 બદલવામાં આવ્યા હતા. હવે આ વખતે 33 ગેટ બદલવામાં આવશે. આ કામ 6થી 7 મહિનાનું છે. પણ મચ્છુ-2 અનેક જગ્યાએ પાણી આપે છે અને જીવાદોરી સમાન છે એટલે કામમાં ખૂબ ઝડપ રાખીને માત્ર 2 જ મહિનામાં પૂર્ણ કરવામાં આવશે. આ કામ પૂર્ણ થયે મચ્છુ-2 ડેમ ગુજરાતનો એવો પ્રથમ ડેમ બનશે. જેના 33 દરવાજા માત્ર બે મહિનાના ટૂંકા ગાળામાં બદલવામાં આવ્યા હોય. હાલ ગેટ બદલવા માટે 8થી 19 ક્રેન બોલાવવામાં આવી છે. આ સાથે ઘણી આગોતરી તૈયારીઓ કરી લેવામાં આવી છે.ઉલ્લેખનીય છે કે મચ્છુ-2 ડેમમાંથી પાણી ઓછું અને ધીમી ગતિએ છોડવામાં આવી રહ્યું છે. જેથી બેઠો પુલ નહિ ડૂબે તેવું જાણવા મળી રહ્યું છે. બીજી તરફ તકેદારીના ભાગરૂપે ડેમના હેઠવાસના ગામોને એલર્ટ પણ કરી દેવામાં આવ્યા છે.
.jpg)
