મોરબી : રેલ્વે સેફ્ટીમાં ઉત્કૃષ્ટ કામગીરી કરવા બદલ મોરબીના લોકો પાઇલોટ સહિત રાજકોટ ડીવીઝનના 6 કર્મચારીઓનું આજે રાજકોટ ડીવીઝન રેલ્વે મેનેજર અશ્વનીકુમાર દ્વારા ડીઆરએમ કચેરી રાજકોટના કોન્ફરન્સ રૂમમાં પ્રમાણપત્ર અર્પણ કરી સન્માન કરવામાં આવ્યું હતું. આ એવોર્ડ રાજકોટ ડિવિઝનના ટ્રાફિક, વિદ્યુત વિભાગ (ટ્રેક્શન) અને એન્જિનિયરિંગ વિભાગના કર્મચારીઓને નવેમ્બર અને ડિસેમ્બર 2024 મહિનામાં રેલવે સુરક્ષામાં શ્રેષ્ઠ કામગીરી કરવા બદલ આપવામાં આવ્યો છે. એવોર્ડ મેળવનાર કર્મચારીઓમાં જયેશ વી (પોઈન્ટ્સમેન- ચમારજ), દિલીપ બી (પોઈન્ટ્સમેન-ચમારજ), નીતિશ કુમાર (પોઈન્ટ્સમેન- રાજકોટ), ધવલ વસોયા (સ્ટેશન માસ્તર- જાલિયાદેવાણી), ગુલશન કુમાર (ગેટમેન ગેટ નંબર 21) અને સંતલાલ (લોકો પાઇલોટ ગુડ્સ મોરબી)નો સમાવેશ થાય છે. ટ્રેનના સંચાલન દરમિયાન, ઉપરોક્ત રેલ્વે કર્મચારીઓએ ટ્રેનમાં અસાધારણતા જોયા, ટ્રેકમાં અસામાન્ય આંચકો અનુભવ્યો, રેલ ફ્રેક્ચર વગેરે નોંધ્યું હતું. આ રેલ્વે કર્મચારીઓની સતર્કતા અને તકેદારીએ સંભવિત રેલ્વે અકસ્માતોને રોકવામાં મહત્વની ભૂમિકા ભજવી છે. આ પ્રસંગે રાજકોટ ડીવીઝનના વરિષ્ઠ મંડળ સેફ્ટી અધિકારી આર.સી. મીણા, વરિષ્ઠ મંડળ ઈજનેર (સંકલન) નરેન્દ્રસિંહ અને મદદનીશ મંડળ વિદ્યુત ઈજનેર (ટ્રેક્શન) સુહાશ બાપટ ઉપસ્થિત રહ્યા હતા.
.jpg)
