- text
મોરબી ચોકડી નજીક પોલીસે પકડી પાડયા
હળવદ : હળવદ તાલુકાના કડીયાણા તરફથી સ્વીફ્ટ ડિઝાયર કારમાં ઘેટા ભરીને લઈ જવામાં આવી રહ્યા હોવાની જીવદયા પ્રેમી યુવાનની બાતમીને આધારે હળવદ પોલીસે મોરબી ચોકડી નજીક વોચ ગોઠવી ત્રણ રાજસ્થાની શખ્સને પાંચ ઘેટા અને સ્વીફ્ટ કાર સાથે ઝડપી લઈ પશુ પ્રત્યે ક્રૂરતા આચરવા મામલે ગુન્હો નોંધી કાયદેસરની કાર્યવાહી કરી હતી.
- text
પ્રાપ્ત વિગતો મુજબ હળવદ તાલુકાના કડીયાણા ગામે રહેતા વિશાલભાઇ નરેન્દ્રભાઇ ત્રીવેદીએ હળવદ પોલીસને બાતમી આપી હતી કે આરજે – 04 – સીએ – 5715 નંબરની સ્વીફ્ટ ડિઝાયર કારમાં ક્રૂરતા પૂર્વક ઘેટા લઈ જવામાં આવી રહ્યા છે. આ બાતમીને આધારે પોલીસે મોરબી ચોકડી નજીક વોચ ગોઠવી ઉપરોક્ત સ્વીફ્ટ કારને અટકાવી તલાશી લેતા આરોપી રહેમાનખાન નેકુખાન, રહે.કોડુકા ગામ તા.પાટોદ જી.બાડમેર રાજસ્થાન, જબરૂદીન રેશમખાન, રહે. પાટોડી ગામ, તા.પાટોદ જી.બાડમેર રાજસ્થાન અને ભવરેખાન ઈશેખાન, રહે.ગંગાપુરા ગામ, તા.પાટોદી જી.બાડમેર રાજસ્થાન વાળાની ગાડીમાંથી બે મોટા ઘેટા તથા 3 ઘેટાના બચ્ચા મળી પાંચ ઘેટા કિંમત રૂપિયા 10 હજાર તેમજ સ્વીફ્ટ કાર કિંમત રૂપિયા 2 લાખ મળી કુલ 2.10 લાખનો મુદ્દામાલ કબ્જે કરી ત્રણેય આરોપીઓ વિરુદ્ધ પશુ પ્રત્યે ક્રૂરતા આચરવા સબબ ગુન્હો નોંધી તમામ ઘેટાઓને હળવદ પાંજરાપોળમાં મોકલી આપવામાં આવ્યા હતા.
- text
