- text
એક સપ્તાહમાં ભાવ ડબલ થઇ ગયા, ચોમાસામાં હજુ વધવાની શક્યતા
મોરબી : લોકસભા ચૂંટણીમાં અબ કી બાર ચારસો કે પારના નારા બહુ ચાલ્યા બાદ આજકાલ મોરબીની શાક માર્કેટમાં અબ કી બાર ડબલ ભાવનો નારો ચાલી રહ્યો હોય તેવી સ્થિતિ વચ્ચે છેલ્લા એક સપ્તાહમાં શાકભાજીના ભાવમાં ભડકો નહીં પણ વિસ્ફોટ થયો હોય તેવી સ્થિતિ સર્જાતા ગૃહિણીઓમાં દેકારો બોલી ગયો છે અને સામાન્ય-મધ્યમવર્ગના નાગરિકો લીલા શાકભાજી કે બટાટાને બદલે કઠોળના શાક બનાવી મોંઘવારી સામે રાહત મેળવી રહ્યા છે.
મોરબીમાં છેલ્લા એક સપ્તાહથી શાકભાજીના ભાવ ભડકો નહીં પણ વિસ્ફોટ થયો હોય તેવી સ્થિતિ જોવા મળી રહી છે, શાક માર્કેટમાં જે શાકભાજીના ભાવ એક મહિના પહેલા હતા તે છેલ્લા એક સપ્તાહમાં ડબલ થઇ ગયા છે . ગૃહિણીઓ શાકભાજી લેવા શાક માર્કેટ જાય છે પણ ભાવ સાંભળીને પરત આવી જાય છે અથવા એક કિલોગ્રામ શાકભાજી લેવાની જગ્યાએ 250 ગ્રામ શાક લઈને પરત આવી જાય છે. પહેલા જે ભાવે એક કિલોગ્રામ શાકભાજી આવતું હતું તે આજના ભાવે માંડ અઢીસો ગ્રામ જ આવી રહ્યું છે.
મોરબીના ગૃહિણી શિલ્પાબેન દવે જણાવે છે કે, અમારે ચાર વ્યકતિના પરિવારમાં બન્ને દીકરીઓ માટે અને પતિ માટે દરરોજ અલગ અલગ શાક બનાવતા હતા પરંતુ હાલના શાકભાજીના ભાવ જોતા ઘરના તમામ સભ્યો માટે માત્ર કે જ શાકભાજી બનાવવાની સાથે હાલમાં કેરીની સીઝન હોવાથી મોંઘા શાકભાજી જમવાને બદલે ક્યારે કઠોળના શાક બનાવી મોંઘવારી સામે લડવું પડી રહ્યું હોવાનું તેમને જણાવ્યું હતું.
તડકાના કારણે શાકભાજી ઓછું આવે છે – વેપારી
મોરબીના શાકભાજીના વેપારી રવજીભાઈએ જણાવ્યું હતું કે હાલ તડકા પડતા હોવાથી ઉપરથી શાકભાજી ઓછું આવે છે પરિણામે શાકભાજી મોંઘા થયા છે. હાલ મોરબીની શાક માર્કેટમાં લોકલ 25 ટકા અને બાકીનું શાકભાજી રાજકોટ, સુરત સહિતના બહારના શહેરમાંથી શાકભાજી આવે છે. જો કે, રવજીભાઈએ આગામી ચોમાસાની સીઝનમાં હજુ પણ શાકભાજીનો ઉતારો ઓછો આવવાને કારણે હજુ ભાવ વધવાની શક્યતા વ્યક્ત કરી હતી.
- text
શાકભાજી પહેલાના ભાવ – આજના ભાવ
બટાટા 20 – 40
ટમેટા 50 – 80
રીંગણાં 80 -100
ગુવાર 100 -150
ભીંડો 60 – 120
કારેલા 60 – 100
વટાણા 100 – 200
ડુંગરી 20 – 50
દૂધી 50 – 80
મરચા 50 – 100
ચોરી 100 -200
કાકળી 30 -80
મેથી 100 – 200
ફુલાવર 50 – 100
કોબીચ 25 – 60
લીલી ડુંગરી 80 -120
લીંબુ 80 – 120
- text
