મોરબી એલસીબીને મળી મોટી સફળતા : ત્રણ લૂંટારુઓ ધરપકડ : સીરામીકના ઉદ્યોગકારને માર મારી, આંખમાં મરચાની ભુક્કી છાંટી ધોળે દિવસે કરાઈ હતી લૂંટ : ગુન્હામાં વપરાયેલા બાઇક અને 10 લાખની રોકડ કબ્જે કરાઈ મોરબી : ગત 25 ફેબ્રુઆરીના રોજ સવારે વાવડી ચોકડી સ્થિત સોમૈયા સોસાયટીમાં સીરામીકના વેપારી પોતાની કારમાં બેસવા જતા હતા એ સમયે બાઇક પર, મોઢે બુકાની બાંધીને ઘસી આવેલા બે શખ્સોએ વેપારીને ધોકો મારી આંખમાં મરચાની ભૂકી છાંટી વેપારી પાસે રહેલા 15 લાખ 80 હજારની રોકડ ભરેલા થેલાની લૂંટ ચલાવી સનસનાટી મચાવી હતી. લૂંટારુઓ જાણે હવામાં ઓગળી ગયા હોય એમ નાકાબંધી અને સીસીટીવી ફૂટેજમાં પણ ઝડપાયા ન હતા. પોલીસે આ લૂંટનો ગુન્હો ઉકેલવા આકાશ પાતાળ એક કર્યા હતા. પોલીસે અલગ અલગ ટિમો બનાવીને તપાસ તેજ કરતા આખરે આ લૂંટારુઓ પોલીસને હાથ લાગી ગયા છે. પો.હેડ.કોન્સ. રજનીકાંત કૈલા, પો.કોન્સ. અશોકસિંહ ચુડાસમા તથા સહદેવસિંહ જાડેજાને બાતમી મળી હતી કે લૂંટમાં સંડોવાયેલા આરોપીઓ અગાઉ મોરબીના અલગ અલગ સીરામીક એકમોમાં ડ્રાઇવર તરીકે નોકરી કરતા હતા અને લૂંટ બાદ તેઓના વતન રાધનપુર બાજુ જતા રહ્યા છે. આ હકીકતની ખરાઈ કરવા એક ટીમ રાધનપુર બાજુ આરોપીઓને માર્ક કરી સતત બે દિવસ સુધી વોચ રાખી હતી. આ દરમ્યાન પોલીસને માહિતી મળી હતી કે શંકાસ્પદ હિલચાલ ધરાવતા ત્રણ શખ્સો મોરબી આઈટીઆઈ પાછળ સિલ્વર પાર્ક સોસાયટી સ્થિત તેમના ઘેર આવવાના છે. આ હકીકતને આધારે વોચમાં રહેલા એલસીબીના સ્ટાફે ઉપરોક્ત આરોપીઓ ઘેર આવતા જ તેમને દબોચી લીધા હતા. ઝડપાયેલા ત્રણ આરોપીઓ પાસેથી ગુન્હામાં વપરાયેલું બાઇક તથા લૂંટમાં ગયેલ કુલ રકમ પૈકી 10 લાખની રોકડ રકમ કબ્જે કરી છે. ઝડપાયેલા આરોપીઓમાં ભરત દયારામભાઈ ચાવડા ઉં.વ. 32 રહે. પ્રેમનગર તા.રાધનપુર, વિક્રમ સુંડાભાઈ દિલેસા ઉં.વ. 20 રહે. પ્રેમનગર તા. રાધનપુર અને ચંદુ ઉર્ફે ચનો મોહનભાઇ ભિલોટા ઉં.વ. 25 રહે. સોલૈયા ગામની સીમમાં તા. માણસા વિરુદ્ધ ધોરણસરની કાર્યવાહી હાથ ધરી છે. બનાવની વધુ તપાસ એલ.સી.બી. પો.ઇન્સ. વી.બી.જાડેજા ચલાવી રહ્યા છે. ગુન્હાને કઈ રીતે અંજામ આપ્યો, મુખ્ય ભેજાબાજ કોણ, ગુન્હો આચરી કઈ રીતે ક્યાંથી ભાગ્યા, ક્યાં ક્યાં આશરો મેળવ્યો સહિતના મુદ્દે પોલીસે આરોપીઓની વધુ પૂછપરછ હાથ ધરી છે. સમગ્ર લૂંટનો ઘટનાક્રમ હવે પછી બહાર આવશે. મોરબી જિલ્લાની કોરોના વાયરસની સચોટ અપડેટ અને સ્થાનિક સમાચારો માટે Morbi Update ની એપ્લિકેશન ડાઉનલોડ કરો અને મેળવતા રહો પળેપળની અપડેટ... https://play.google.com/store/apps/details?id=com.morbiupdate.news તેમજ Morbi Update નું ફેસબુક પેઈજ લાઈક કરી, જુઓ સ્થાનિક સમાચારોની સાથે મોરબીના લાઈવ વિડિઓ... https://www.facebook.com/morbiupdate/
.jpg)
