ફાયર બ્રિગેડની ટીમે ભારે જહેમત બાદ બપોરે મૃતદેહોને બહાર કાઢ્યા, પોલીસ દ્વારા આગળની કાર્યવાહી હાથ ધરાઈમોરબી : મોરબી પંથકમાં આજે એક અત્યંત દુઃખદ અને કરુણ ઘટના સામે આવી છે. મોરબી નજીક આવેલા જુના સાદુળકા ગામ પાસે પાણીથી ભરેલા એક મોટા ખાડામાં (તલાવડીમાં) ડૂબી જવાના કારણે 3 લોકોએ પોતાનો જીવ ગુમાવ્યો છે. આ ઘટનાને પગલે સમગ્ર પંથકમાં અરેરાટી સાથે શોકની લાગણી પ્રસરી જવા પામી છે. તંત્ર અને ફાયર વિભાગની ટીમે તાત્કાલિક ધોરણે ઘટનાસ્થળે પહોંચીને રેસ્ક્યુ ઓપરેશન હાથ ધર્યું હતું અને કલાકોની જહેમત બાદ ત્રણેય મૃતદેહોને બહાર કાઢવામાં આવ્યા છે.પ્રાપ્ત વિગતો અનુસાર, મોરબીના સાદુળકા ગામે એક તલાવડી જેવો મોટો ખાડો આવેલો છે જેમાં હાલ પૂરતા પ્રમાણમાં પાણી ભરેલું છે. આજે સવારે 11 થી 11:30 વાગ્યાના અરસામાં 3 જેટલા લોકો આ પાણી ભરેલા ખાડામાં નાહવા પડ્યા હતા અથવા તો અન્ય કોઈ અગમ્ય કારણોસર તેઓ અંદર પડ્યા હતા. પાણી ઊંડું હોવાના કારણે આ ત્રણેય લોકો ડૂબવા લાગ્યા હતા. આ ગોઝારી ઘટનાની જાણ થતાં જ આસપાસના વિસ્તારમાં ભારે દોડધામ મચી ગઈ હતી અને બચાવ કામગીરી માટે તાત્કાલિક ફાયર બ્રિગેડની ટીમને જાણ કરવામાં આવી હતી.આ બનાવની જાણ સવારે 11:30 વાગ્યાની આસપાસ થતાં જ મોરબી ફાયર બ્રિગેડની ટીમ તાત્કાલિક ઘટનાસ્થળે દોડી ગઈ હતી. ફાયરની ટીમે પાણીમાં ડૂબી ગયેલા લોકોને શોધવા માટે સઘન રેસ્ક્યુ ઓપરેશન શરૂ કર્યું હતું. કલાકોની ભારે જહેમત બાદ આખરે બપોરે અંદાજે 2:30 થી 2:45 વાગ્યાની આસપાસ ફાયર બ્રિગેડના જવાનોને પાણીમાંથી 3 લોકોના મૃતદેહ (ડેડ બોડી) બહાર કાઢવામાં સફળતા મળી હતી. હાલ આ ત્રણેય મૃતકો કોણ છે, ક્યાંના રહીશ છે અને ખરેખર કયા કારણોસર પાણીમાં પડ્યા હતા તે જાણવા માટે સ્થાનિક પોલીસ દ્વારા આગળની વધુ તપાસ સઘન રીતે ચલાવવામાં આવી રહી છે.#Morbi #MorbiUpdate #Sadurka #MorbiNews #GujaratNews #TragicIncident #DrowningIncident
.jpg)
