હળવદ : હળવદ તાલુકાના ઢવાણા ગમના શિક્ષકે કોરોનાની મહામારીના કાળમાં સરકાર વિરુદ્ધ પોસ્ટ વાયરલ કરી હોવાથી અગાઉ તેમની સામે ફરજ મોકૂફીના પગલાં લેવાયા હતા. દરમિયાન તેમની વિરુદ્ધ નિમેલી તપાસ સમિતિ સમક્ષ આ શિક્ષકે પોતાની ભૂલ સ્વીકારી લીધી હોય અને આ તપાસ સમિતિની રિપોર્ટ આવી ગયા બાદ મોરબી જિલ્લા પ્રાથમિક શિક્ષણાધિકારીએ આ શિક્ષકની દાહોદ ખાતે બદલી કરી હતી.મોરબી જિલ્લા પ્રાથમિક શિક્ષણાધિકારી મયુર પારેખે આ અંગેની વિગતવાર વિગતો આપી હતી કે હળવદના ઢવાણા ગામની શાળાના આસી. શિક્ષક જીજ્ઞેશ વાઢેરએ કોરોનાના કાળમાં અગાઉ રાજ્ય અને કેન્દ્ર સરકાર વિરુદ્ધ સોશ્યલ મીડિયામાં પોસ્ટ વાયરલ કરી હતી. આથી, આ બનાવમાં તેમની વિરુદ્ધ ફોજદારી કાર્યવાહી થઈ હતી. તેમજ મોરબી જિલ્લા પ્રાથમિક શિક્ષણાધિકારીએ ગત જૂન માસના પ્રથમ તબક્કે આ શિક્ષકને ફરજ મોકૂફ કરી દીધા હતા અને તેમની વિરુદ્ધ તપાસ સમિતિ નીમવામાં આવી હતી. આ તપાસ સમિતિએ આ બનાવની ગહનતાથી તપાસ કરી હતી અને શિક્ષકે પણ પોતાની ભૂલ સ્વીકારી લીધી હતી. આથી, આ બનાવની તપાસ કરીને તપાસ સમિતિએ અહેવાલ જિલ્લા પ્રાથમિક શિક્ષણાધિકારીને સોંપ્યો હતો. જિલ્લા શિક્ષણાધિકારીએ નિયમ મુજબ શિક્ષક જીજ્ઞેશ વાઢેરનો એક વર્ષનો ઇજાફોની રૂકાવટ કરીને તેમની દાહોદ જિલ્લામાં બદલી કરી નાખી છે.
.jpg)
