ઓવરબ્રિજના કામના કારણે સિંગલ પટ્ટી રોડ બનતા ટ્રાફિક જામ; હળવદ અને પીપળી રોડ પર જતા સિરામિક ઉદ્યોગના વાહનોને ભારે હાલાકીમોરબી અપડેટ : મોરબીના નેશનલ હાઈવેથી મહેન્દ્રનગર ચોકડી તરફ જવાના રસ્તા પર દરરોજ ભારે ટ્રાફિક જામની સમસ્યા સર્જાઈ રહી છે, જેના કારણે વાહનચાલકો અને સ્થાનિકો પારાવાર મુશ્કેલીનો સામનો કરી રહ્યા છે. આ રોડ પરથી પસાર થતાં લોકોને ટ્રાફિકની આ ભયંકર પરિસ્થિતિ રોજિંદી બની ગઈ છે.મળતી માહિતી મુજબ, આ વિસ્તારમાં હાલ ઓવરબ્રિજની કામગીરી ચાલી રહી હોવાથી રસ્તો સિંગલ પટ્ટીનો બની ગયો છે, જે આ ભયંકર ટ્રાફિક જામનું મુખ્ય કારણ છે. મોરબીનો આ રોડ સતત ધમધમતો રહે છે. ખાસ કરીને નેશનલ હાઈવે પરથી હળવદ હાઈવે અને પીપળી રોડ પર આવેલા સિરામિક ઉદ્યોગોના યુનિટ્સમાં જવા માટે મોટા ટ્રકો અને અન્ય ભારે વાહનો આજ રસ્તાનો ઉપયોગ કરે છે, જેના પરિણામે ટ્રાફિકની સમસ્યા વધુ ગંભીર બને છે.સ્થાનિકોના જણાવ્યા અનુસાર, એક પણ દિવસ એવો નથી જતો જ્યારે આ નેશનલ હાઈવેથી મહેન્દ્રનગર ચોકડીથી લઈને ઘૂટું આઈટીઆઈ સુધીના વિસ્તારમાં સળંગ ટ્રાફિક જામ ન રહેતો હોય. આ સતત રહેતા ટ્રાફિક જામના કારણે સિરામિક ઉદ્યોગકારો, કર્મચારીઓ અને સામાન્ય જનતાને ભારે હાલાકી ભોગવવી પડી રહી છે.આ રોજિંદી સમસ્યાથી ત્રસ્ત થઈને સિરામિક ઉદ્યોગકારો અને સ્થાનિકોએ આ બાબતે કાયમી ઉકેલ લાવવા માટે ઉગ્ર માંગણી કરી છે. તેઓની રજૂઆત છે કે તંત્ર દ્વારા આ વિસ્તારમાં ટ્રાફિક બ્રિગેડની નિમણૂક કરવામાં આવે અથવા અન્ય કોઈ યોગ્ય વ્યવસ્થા કરી આ ટ્રાફિકની જટિલ સમસ્યામાંથી કાયમી છુટકારો અપાવવામાં આવે.#Morbi #MorbiUpdate #MorbiNews #TrafficJam #NationalHighway #MahendranagarChokdi #CeramicIndustry #OverbridgeWork #TrafficIssue
.jpg)
