જયેન્દ્રસિંહ ઝાલાના જન્મદિવસ નિમિત્તે 3 બ્લડ બેન્કના સહયોગથી યોજાયેલા કેમ્પમાં સરકારી બ્લડ બેન્કને પણ ખાસ આમંત્રણ અપાયુંવાંકાનેર (મોરબી અપડેટ) : વાંકાનેરના જીનપરા સ્થિત વિશ્વકર્મા મંદિર ખાતે યુવા સારથી સંગઠન દ્વારા જયેન્દ્રસિંહ મઘુભા ઝાલાના જન્મદિવસ નિમિત્તે એક મહારક્તદાન કેમ્પનું આયોજન કરવામાં આવ્યું હતું. આ કેમ્પમાં વાંકાનેર શહેર તથા આસપાસના વિસ્તારોમાંથી મોટી સંખ્યામાં રક્તદાતાઓ ઉત્સાહભેર જોડાયા હતા અને કેમ્પ દરમિયાન કુલ 334 બોટલ રક્ત એકત્રિત કરવામાં આવ્યું હતું.આ કેમ્પનું આયોજન માત્ર રક્ત એકત્રિત કરવા પૂરતું સીમિત ન હતું, પરંતુ થેલેસેમિયા સહિતની ગંભીર બીમારીઓમાં જરૂરિયાતમંદ દર્દીઓ સુધી રક્તસેવાનો લાભ પહોંચે અને સમાજમાં નિયમિત રક્તદાન અંગે જાગૃતિ વધે તેવા ઉમદા હેતુથી કરવામાં આવ્યું હતું. કેમ્પમાં રક્તસંગ્રહની વ્યવસ્થા વધુ વ્યાપક અને સુચારુ રીતે થઈ શકે તે માટે રાજકોટની લાઇફ બ્લડ બેન્ક, મોરબીની લાઇફ કેર બ્લડ બેન્ક તેમજ રાજકોટ સિવિલ હોસ્પિટલની સરકારી બ્લડ બેન્કની ટીમને ખાસ આમંત્રિત કરવામાં આવી હતી.સરકારી બ્લડ બેન્કને આમંત્રણ આપવા પાછળ યુવા સારથી સંગઠનનો એક વિશેષ ઉદ્દેશ્ય હતો. સરકારી આરોગ્ય સેવાઓનો લાભ મોટાભાગે આર્થિક રીતે નબળા વર્ગના દર્દીઓ લેતા હોય છે. જેથી સરકારી બ્લડ બેન્કમાં એકત્રિત થયેલું રક્ત સીધું ગરીબ અને જરૂરિયાતમંદ દર્દીઓ સુધી પહોંચવામાં ઉપયોગી બની શકે. આ રીતે એક જ સંસ્થા પૂરતું મર્યાદિત રહેવાને બદલે 3 વિવિધ બ્લડ બેન્ક સાથે સંકલન કરીને રક્તસંગ્રહનું કાર્ય કરવામાં આવ્યું હતું.આ મેગા બ્લડ ડોનેશન કેમ્પને સફળ બનાવવા માટે બોલ બાલા ટ્રસ્ટ, ગઢીયા હનુમાન મિત્ર મંડળ સહિત વાંકાનેરની અનેક સામાજિક અને સેવાભાવી સંસ્થાઓ, કાર્યકર્તાઓ તથા સ્વયંસેવકોએ ભારે જહેમત ઉઠાવી હતી. યુવા સારથી સંગઠને જણાવ્યું હતું કે 334 બોટલ રક્તનું એકત્રિકરણ એ માત્ર એક આંકડો નથી, પરંતુ વાંકાનેરની જનતાની જાગૃતિ અને સામૂહિક જવાબદારીનું પરિણામ છે. અંતમાં આયોજકો દ્વારા તમામ રક્તદાતાઓ, તબીબી ટીમો, સહયોગી સંસ્થાઓ અને વાંકાનેરની જનતાનો હૃદયપૂર્વક આભાર વ્યક્ત કરવામાં આવ્યો હતો.#Wankaner #BloodDonation #YuvaSarthiSangathan #WankanerNews #MorbiUpdates #BloodDonationCamp #SocialWork #RajkotCivilHospital
.jpg)
