વડોદરાના વડસર ખાતે સાહિત્યિક સમારોહમાં 16 પુસ્તકોનું અનાવરણ કરાયુંટંકારા : વડોદરાના વડસર ખાતે તાજેતરમાં એક ભવ્ય સાહિત્યિક સમારોહ યોજાયો હતો. આ કાર્યક્રમમાં મોરબીના ટંકારા તાલુકાના રાજ્ય એવોર્ડી શિક્ષિકા અને જાણીતા બાળસાહિત્યકાર જીવતીબેન બચુભાઈ પીપલિયા (ઉપનામ: 'શ્રી') ના એકસાથે 3 પુસ્તકોનું મહાનુભાવોના હસ્તે વિમોચન કરવામાં આવ્યું હતું. રાઘવજીભાઈ માધડ, ભગીરથભાઈ બ્રહ્મભટ્ટ, પિનાકીનભાઈ પારેખ અને અમૃતભાઈ બાઈન્ટાઈનવાલાએ આ પુસ્તકોને ખુલ્લા મૂક્યા હતા.વિમોચિત થયેલા પુસ્તકોની વિશેષતાજીવતીબેન પીપલિયાના જે 3 પુસ્તકોનું વિમોચન કરવામાં આવ્યું તેમાં 1) સ્નેહની ગાંઠ: માનવીય સંબંધોની ઉષ્મા દર્શાવતો વાર્તાસંગ્રહ.2) સ્નેહ સરિતા: લાગણીઓ અને જીવનના સંવેદનશીલ પ્રસંગોનો કાવ્યસંગ્રહ.3) પરીબાઈની પાંખે (કચ્છી અનુવાદ): ગુજરાત સાહિત્ય અકાદમી પુરસ્કૃત બાળગીત સંગ્રહનો કચ્છી ભાષામાં અનુવાદ છે. નોંધનીય છે કે આ સમારોહમાં અન્ય 13 પુસ્તકો મળી કુલ 16 પુસ્તકોનું વિમોચન થતા સમગ્ર કાર્યક્રમ સાહિત્યના મહાકુંભ સમાન બની રહ્યો હતો.શિક્ષણથી સાહિત્ય અને ડિજિટલ પ્લેટફોર્મ સુધીની સફરઅમરેલીના પીઠડીયા ગામના વતની અને હાલ ટંકારામાં કાર્યરત જીવતીબેન પીપલિયાની સાહિત્યયાત્રા લોકડાઉન દરમિયાન વેગીલી બની હતી. અત્યાર સુધીમાં તેમણે 'હાથીદાદાની જય હો', 'નટખટ' અને 'આવો, કહું એક વાર્તા' જેવા અનેક પુસ્તકો આપ્યા છે. સંપાદન ક્ષેત્રે પણ તેમણે 'દેશથી પરદેશ સુધી', 'પર્યાવરણથી પ્રીત, સાચી જીવનની રીત', 'ઝળહળતા તારલા' અને 'જાદુઈ જપ્પી' જેવા ગ્રંથોમાં નોંધપાત્ર યોગદાન આપ્યું છે. તેમનું પુસ્તક 'પરીબાઈની પાંખે' વર્ષ 2022 માં રાજ્ય કક્ષાએ તૃતીય શ્રેષ્ઠ પુસ્તક તરીકે પસંદ પામ્યું હતું.શિક્ષણ અને સાહિત્ય ઉપરાંત તેઓ ડિજિટલ ક્ષેત્રે પણ તેટલા જ સક્રિય છે. તેમની YouTube ચેનલ 'હું અને મારા બાળકો' ને 1,00,000 થી વધુ સબ્સ્ક્રાઇબર્સ મળતા YouTube તરફથી સિલ્વર પ્લે બટન પણ એનાયત કરવામાં આવ્યું છે.મહાનુભાવોએ પાઠવ્યા અભિનંદનકાર્યક્રમમાં ઉપસ્થિત સાહિત્યરસિકો, કવિઓ અને લેખકોએ જીવતીબેનના સર્જનને બિરદાવ્યું હતું. ખાસ કરીને બાળમનને કેન્દ્રમાં રાખીને કરવામાં આવતું તેમનું લેખન બાળકોમાં વાંચનપ્રેમ અને સંસ્કારોનું સિંચન કરે છે તેવું મહાનુભાવોએ જણાવ્યું હતું.#Morbi #Tankara #Literature #BookLaunch #Education #Author #GujaratiLiterature #Vadodara #MorbiUpdate
.jpg)
