- text
વારંવાર ચોરીના બનાવો બનતા ગામલોકો જાતે જ કરે છે ચોકી પહેરો
મોરબી : માળિયાના પીપળીયા ચાર રસ્તા તથા ચાચાવદરડા ગામ સહિત આસપાસના વિસ્તારો પોલીસ કરતા તસ્કરોનું નાઈટ પેટ્રોલીંગ એટલી હદે વધી ગયું છે કે,ગામલોકોને રાત ઉજાગર કરવા પડી રહ્યા છે.પોલીસ મદદે ન આવતા ચોરીના બનાવો અટકાવવા માટે આવી કડકડતી ટાઢમાં ચાચાવદરડા ગામના લોકો હમણાંથી દરરોજ રાત્રી પહેરો કરી રહ્યા છે.
- text
માળિયાના પીપળીયા ચાર રસ્તા અને આસપાસના ચાચાવદરડા ગામ સહિતના વિસ્તારોમાં ઠંડી વધતાની સાથે જ જાણે પોલીસ ગરમ ધાબળામાં નસકોરા બોલાવતી હોય તેમ રેઢાપડ પડેલા આ વિસ્તારોમાં તસ્કરોનો તરખાટ વધી રહ્યો છે.જો કે પીપળીયા ચોકડી પાસે થોડા દિવસો પહેલા સાત દુકાનો તૂટી હતી. કહેવાતા નાઈટ પેટ્રોલીંગના ધજજીયા ઉડી ગયા બાદ પણ પોલીસે આ બનાવની તપાસમાં પણ બેદરકારી રાખીને કાર્યવાહી સામે જાતે જ સવાલ ખડા કર્યા હતા.જો કે ચાચાવદરડા ગામ અને આસપાસના વિસ્તારોમાં ચોરીના બનાવો વધતા હોય અને ઉપરથી પોલીસ તરફથી યોગ્ય મદદ ન મળતા પોતાની કિંમતી માલમતા સાચવવા માટે ગામ લોકોએ રાત્રી પહેરો શરૂ કર્યો છે.અને દરરોજ પાંચ થી છ યુવાનો આવી કાતિલ ઠંડીમાં પણ રાત ઉજાગર કરીને ગામનો ચોકી પહેરો ભરી રહ્યા છે.
- text
